HUTA NI SIREGAR Versi bahasa Batak

HUTA NI SIREGAR..

Tarbarita ma sada raja na sangap namarsahala ima ompungta Ompu Raja Siregar namangalap boru ni raja i ma boru ni Raja Limbong Mulana nasangap namartua.

Ia Ompu Raja Siregar ima anak siampudan ni Raja Lontung nadigoaran huhut Raja Sirintis Dalan diakka ianakonni Raja Lontung.

Opat do anakni Ompu Raja Siregar ima Raja Silo dohot Raja Dongoran tubuni Pitta Omas boru Limbong jala Raja Silali dohot Raja Siagian tubuni Omas Palakki boru Limbong.

RAJA SILO.

Ia Raja Silo marhuta maon di ginjang ni Huta Nagodang, Muara nuaeng.

Mangoli ma ibana jala dialap ma boru ni Raja i boru Manurung sian Huta Gurgur.

Tubu ma anakna i ma Ompu Tuan Dihorbo, Tuan Nahoda Raja, Silima Lombu, Datu Bira dohot Datu Mangambetua.

Dinamasa haleon namarsipurpur di Muara lao ma manuat akka pomparan ni Ompu Raja Siregar tu luat Humbang, dohot ma pomparan ni Raja Silo sundut paopathon sian Ompu Raja Siregar i ma Datu Nasangap.

Gabe marhuta ma pinomparna di luat Humbang, ima di Pearung, Sigumpar, Paranginan, Lintong Ni Huta dohot akka naasing dihorong i.

Adong ma sian pomparan ni anakonna na marhuta tu luat Sigaol, ima pomparan ni Raja Naubanon > Raja Banua > Guru Nilaingan.

Marga Siregar do dibahen nasida margana disi.

Sian pomparanna nadeba lao do muse tu luat Pangaribuan dung parjolo marhuta di Lobu Siregar, ala hurang napu do tano disi, jala adong saotik pargulutan dohot pomparan ni Sibagot Ni Pohan gabe torus ma nasida tu Pangaribuan.

Ima pomparan ni Sijambe Ulubalang >>> Datu Onggang dohot pomparan ni Raja Naubanon >>> Ompu Tuan Sumar.

Marhuta ma nasida di Lumban Sormin, Pagaran Dolok, Lobu Sonak, Najumambe, Sukarame, Aek Tangga dohot akka huta naasing dihorong i.

Sian luat Pangaribuan bahat do muse pomparan Raja Silo nasahat tu luat Angkola Dolok ima di Arse, Sipirok (alana nungnga marhuta disi pomparan ni Raja Dongoran) dohot Marancar, Batangtoru.

Ia marga ni nasida di luat Pangaribuan ima Sormin nadeba nari tong marga Siregar.

Pomparan sian Datu Ondop namarhuta di luat Marancar ima pomparan sian Raja Tinamboran gabe mambahen marga Baumi do manang Siregar Baumi.

RAJA DONGORAN.

Ia Raja Dongoran marhuta ma diatas ni Huta Nagodang, Muara nuaeng, pajonok-jonok dohot hutani Raja Silo.

Disi dope saonari mual paridian ni ompu i.

Mangoli ma ompungta on, dialap ma boru ni raja i boru Sagala sian huta Pariksabungan di Sianjurmulamula.

Tubu ma anakna sada margoar Sahala Raja dohot boruna margoar Siboru Bunga Marsondang Nauli namuli tu Raja Sitompul di Lobu Pining, Pahae.

Ia anak ni Sahala Raja sada do namargoar Ompu Junjungan.

Ompu junjungan opat ma anakna ima Datu Baragas, Datu Nahurnuk, Datu Mangapung dohot Datu Parultop.

Dinamasa haleon di Muara, songon naung binaritahon dijolo, borhat ma Datu Baragas, Datu Nahurnuk dohot Datu Mangapung mangalului tano nadumenggan rappak dohot hahadolina sian pinompar ni Raja Silo dohot pinompar ni anggidolina sian pinompar ni Raja Silali dohot Raja Siagian.

Dung sahat nasida di Dolok Pangiringan sai mangandungi do ompu i Datu Nahurnuk huhut manatap tu luat Muara.

Sahat ma nasida tu luat Humbang jala sonduk hela ma akka pomparanna tu pomparan ni Raja Sihombing naung jumolo marhuta disi.

Ia Datu Baragas mulak do muse tu Muara jala disi do ibana marobur.

Adong do sada anakna nanigoaran songon goarni anggina i ma Datu Nahurnuk Ingot-ingot ala naung masihol hian ompu i Datu Baragas tu anggina Datu Nahurnuk.

Didok ma, ho ma amang gabe parningotanhu tu amangudamu Datu Nahurnuk naung lao tu luat sileban, ninna ma, gabe dibahen ma goar ni anakna Datu Nahurnuk Ingotingot.

Ia anakni Datu Baragas onom do, i ma, Sunggu Raja, Datu Nahurnuk Ingotingot, Datu Bondang, Datu Manggiang, Sahala Raja dohot Sahala Datu.

Marhuta ma pomparan sian ianakkon ni Datu Baragas di luat Humbang ima sian pomparan ni Sunggu Raja >> Ompu Sidemdem - Ompu Matio di Lumban Dongoran dohot di Lumban Matio.

Sian pomparan ni Datu Bondang marhuta ma muse di Naga Timbul alai dipudian niari gabe lao do muse pomparanna tu luat Pangaribuan mandapothon pomparan ni Datu Manggiang naung parjolo muse mamukka huta disi.

Ia marga nasida di luat Humbang marga Siregar do.

Ia Datu Nahurnuk Ingotingot sada ma anakna margoar Datu Naburju, Datu Naburju sada muse anakna margoar Guru Pangaluan nalao tu luat Pangaribuan mangalului pomparan ni Raja Dongoran nadeba nari, huhut manandanghon hadatuonna.

Marhuta ma ibana di Silantom jala disi ma tading akka ianakonna, nadeba marserak tu Rahut Bosi dohot luat Pahae.

Siregar do marga nasida disi.

Ia ianakonni Datu Bondang marhuta do jolo di Naga Timbul, Lintong Ni Huta, Humbang, songon naung pinaboa dijolo.

Alai dipudian niari lao do pomparanna tu luat Pangaribuan jala mamukka huta ma disi ima huta Bonan Dolok, Simaninggir, nadeba mian ma muse dihutani pomparan Datu Manggiang ima huta Lumban Dongoran.

Siregar do marga nasida di Bonan Dolok, alai natinggal di Lumban Dongoran gabe marga Dongoran do.

Ia Datu Manggiang lao do akka ianakonna tu luat Pangaribuan jala mamukka huta disi songon naung pinaboa dijolo ima Lumban Dongoran.

Alai adong do ianakkonna nalao tu Padang Bulan luat Garoga, sian i muse sahat tu Sihulambu jala marhuta disi.

Ia marga nasida di Lumban Dongoran dohot di Sihulambu, Aek Bilah marga Dongoran do.

Ianakonni Sahala Raja marhuta do di luat Garoga, ima di Pangorian.

Siregar do marga nasida disi.

Ianakonni Sahala Datu lao do tandang tu luat Angkola, ima namargoar Takkulapa Nabara.

Sahat ma ibana tu Sipirok jala mian dihuta harajaon ni Ompu Ni Hatunggal pomparan nasian Datu Nahurnuk.

Burju do Ompu Ni Hatunggal tu ibana jala dibahen do ibana gabe hulubalang ni Ompu Ni Hatunggal.

Sada do anakna margoar Raja Sigurda.

Ia akka ianakonna marhuta do diluat Padangbolak.

Siregar do dibahen nasida margana disi.

Nadeba nari Siregar Sigurda.

Ditulis Oleh Marsada Siregar